UMceceshi Cedric Kaize uncoma Aden Mc Carthy ngekutimisela kwakhe
Loweminyaka lenge-21 ngebudzala lodlala emuva ngelinyawo lesencele, utimisele kakhulu watikhandla kulemidlalo lemibili ledlaliwe ye-Betway Premiership.
Mc Carthy utfole miklomela (ye-Man of the match) lemibili kulemidlalo lemibili ngekulandzelana. Loku kujabulise balandzeli kanye nebaphatsi balelicembu kufaka ekhatsi baceceshi.
Kaze utsi, “Labantfu labaklomelisa lomutklomelo webu-Man of the match benta timphilo tetfu tibematima, ngoba lomdlali utocabanga kakhulu ahlangahlangane noma acakeke kutsi afune kuwina kuyo yonkhe lemidlalo, kodvwa kumungele yena, ngiyadlala,” asho ahleka.
“Ungumfanyane lokahle kakhulu, ukhaliphile kakhulu ngendlela yekutsi uyakhona kutikhandla phakatsi nangaphandle kwenkhundla. Lengingakusho kakhulu ngaye kutsi ungumdlali lolalelako kakhulu.” Kusho umceceshi Cedric Kaize.
Ungetele watsi, “ Futsi uhlala ana-Zitha Kwinika na-Miguel. Uhlala analabadlali lababili ngoba uyati kwekutsi lwati lwabo lungamsita. Nginesiciniseko lesihle kutsi ngaphandle kwekulimala tsite , utoya khashane lomdlali ngebhola letinyawo. Ungumdlali losezingeni lelisetulu kakhulu.”
Mc Carthy uyincenye yebadlali lababuya ecenjini lelincane le-Kaizer Chiefs, kumdlalo we-Kaizer Chiefs wekucala ne-Stellenbosch FC utfole umklomela wakhe wekucala wekuba mdlali lodlale kahle. Waphindza futsi kumdlalo wabo ne-Polokwane City FC watsatsa umklomela wakhe wesibili.
