We-SAFA uphawula ngematfuba ekufakwa kwe-VAR e-Mzansi
Inhloko yabonompempe kuSouth African Football Association (Safa), Abdul Ebrahim, seyikhulume ngematfuba ekucaliswa kweVideo Assistant Referee (VAR) eNingizimu Afrika.
Kulindzelwe kakhulu kutsi lolu hlelo lwebucwepheshe lolusita bonompempe lucale kusebenta ka-PSL.
Nanoma-ke, ngekwemavi a-Ebrahim, mancane kakhulu ematfuba ekutsi iVAR icaliswe kusukela ekucaleni kwesizini ya-2026/27 letawucala ngalenyanga ye-Ingci.
Ngcongcoshe wetemidlalo, Gayton McKenzie, sewubeke eceleni R40 million kute kucaliswe iVAR ebholeni laseNingizimu Afrika.
FUNDZA LANA: Lokubange i-Chiefs yaphutfumisa Mako ekhaya
Nanoma-ke, Ebrahim utsite kusamele kutfolakale imvume kuNational Executive Committee (NEC) yeSafa ngaphambi kwekutsi lolu hlelo lucale kusebenta.
“Sesiyitfolile imali kuhulumende futsi tingcoco tiyachubeka mayelana netinyatselo letilandzelako,” kusho Ebrahim akhuluma ne-SABC Sport.
“Kusamele sitfole imvume kuNational Executive Committee. Nasiyitfolile, sitawucala kucecesha bantfu labatawusebenta nge-VAR.”
Uphindze watsi akalindzeli kutsi iVAR icale kusebenta kusukela ekucaleni kwesizini lensha.
“Ngesizini ya-2026/27, mancane ematfuba ekutsi icale ngekushesha.”
“Nangabe konke kuhamba kahle, singayibona icala kusebenta etigabeni tekugcina tesizini.”
Ebrahim uphindze waveta kutsi sekukhona lithimba leSafa leliphetse umsebenti weVAR, futsi litawutiniketa umphakatsi lwati lolunyenti madvute mayelana netinhlelo tekwetfula lobu buchwepheshe.
Story by Nkosinathi
