Youssef uphawula nga Morris longene ngeligoli iChiefs ishaya Sekhukhune

Lomceceshi welicembu le-Kaizer Chiefs Khalil Ben Youssef uphawule ngalomgadli wabo Tashreeq Morris loshaye ligoli lakhe lekucala ngemdlalo wakho wekucala walesizini.

I-Chiefs ishaye Sekhukhune United 2:0, ngeLisontfo. Ligoli lekucala lishatjwe nguye Tashreeq Morris longene asuka ebhentjini.

Lesibili kwaba iphenathi leshatjwe ngu-Mfundo Vilakazi naye lobekasuka ebhentjini. Ngemaminitsi nje ekugcina alomdlalo.

Lemiphumela ibeka i-Kaizer Chiefs kunombolo-3 nemaphuzu layi-51 kulelitafula lesicoco sendzebe ye-Betway Premiership.

Umceceshi Ben Youssef, ubese ucacisa mayelana nesincumo sekufaka lomgadli loneminyaka leyi-31 ngebudzala kungakalimdzelwa.

“Morris uyincenye tebadlali betfu, kantsi futsi usebenta kamatima ejimini,” kuchaze lomceceshi we-Chiefs.

“Besilimdze sikhatsi lesifanele kutsi simdlalise, ngako ke, ngicabanga kutsi bekungiso sikhatsi lesikahle sekutsi simetfule kulelicembu.

“Sicale samecwayisa ngekubaluleka kwalomdlalo, kantsi futsi bantfu basebenta ngansesnse kuhlela lomdlali.

“Ngitsandza nekubonga kakhulu kumceceshi, Dillon, kanye na-Nathi, kutsi batikhandle kakhulu ngekuhlela lomgadli.”

I-Chiefs iyobukana ne-AmaZulu kumdlalo wabo lolandzelako, bese bayivala ngekwamukela iChippa United ekhaya.

By:Nkosinathi