Hotto uvete ngekubambisana kwakhe na-Mofokeng.
Umdlali wasemuva welicembu le-Orlnado Pirates, Deon Hotto, uvete imfihlo yakhe yekubambisan akwakhe lokusimanga na-Rebohile Mofokeng.
Uvete kwekutsi abavamisi kubita ibhola umangabe munye wabo ayibambile, ngobe bayati kutsi batfolana kuphi ngesikhatsi.
Hotto uvete kwekutsi kususkela badlale emasizini lamatsatfu babonkhe, bakhone kwakha budlelwane bekuvisisana.
Umangabe ibhola inamunye wabo, lona lomunye uyati kwekutsi kwamele eme/alindze kuphi kute akhone kutfola lebhola.
Deon Hotto ubike loku ngemuva kwekutsi licembu lakhe le-Pirates likoleke emaphuzu la-3, babulala licembu le-Chippa United 2-0 kumdlalo we-Betway Premiership.
Lomdlalo udlale ngoLesibili ebusuku eNkhundleni yase-Orlando likhaya le-Orlando Pirates.
Licembu le-Chippa United likhombise kufaka umfutfo nekutikhandla ekucaleni kwalomdlalo, belitsembisa kutsi lingahle lincobe lomdlalo.
Kodvwa, ngemuva kwemaminitsi la-15’ alomdlalo, Mofokeng utfole ibhola lenhle wayidlalela Hotto ngekuphutfuma.
Hotton aye wayifakela Makgopa ngekuphutfuma washaya phakatsi ligoli lekubika lalomdlalo.
Licembu le-Pirates litfole ligoli ngemaminitsi ekugcina alomdlalo, intsambo ledze ledvonswe ngu-Oswin Appollis, eligoli lishiye Dumisa Msibi amangele.
Deon Hotto utfole umklomelo wekuba i-man of the match yalomdlalo , uchaze kabanti ngebudlelwane bakhe na-Mofokeng.
“Kube ngumdlalo lomatima kakhulu. I-Chippa isemsileni wale-logo, besatikahle kutsi batawufuna kulwa, ngoba umangabe uphansi, kwamele ulwe vele,” kukhulume Hotto.
Ubutwe ngekuchumana kwakhe kwekudlala na-Mofokeng lokudale kwekutsi batfole ligoli lekucala.
“Kuchumana kwami na-Relo kubuya ekudzeni kakhulu, seminyaka lemitsatfu nyalo,” kuchubeke lesihlabane saeveni lase-Namibia.
“Umangabe anebhola, uyati kwekutsi utongitfolaphi, akudzingi nekutsi ngimemete, uyati kutsi ngisuke ngilifunaphi.”
Ngalemiphumela licembu le-Orlando Pirates selilingana nebaholi baleligi, i-Mamelodi Sundown, umehluko ligoli leinye.
Umdlalo we-Pirates lolandzelako, batawuvakashela licembu le-Durban City, e-Durban ngeMgcibelo emini.
