IBanyana ibukise ngeLes Teranga Lionesses
IBanyana Banyana ishaye iSenegal ngo 2-0 emdlalweni wesibili wobungani eStade Lat Dior eSenegal kusihlwa.
La maqembu womabili eze kulo mdlalo ebambene ngo 1-1 ngoMgqibelo. IBanyana Banyana ishaye kuqala kwathi iLes Teranga Lionesses yalinganisa ngemuva kwemizuzu engu-90 ngephenathi.
Namuhla iBanyana Banyana iqale ngonyawo oluphezulu njengoba ishaye amagoli ayo amabili esiwombeni sokuqala. Igoli lokuqala lishaywe ngu-Amogelang Motau ngomzuzu ka-13.
UNoxolo Cesane unyuse amagoli ngomzuzu ka-43. Bobabili laba badlali badlalela i-UWC Ladies edlala kuHollywoodBets Super League okuyiligi ekhokhelwayo yabesifazane eNingizimu Afrika.
Isiwombe sokuqala siphele ngo 2-0 kwathi ngesiwombe sesibili amaqembu awashayanga amagoli. Umqeqeshi uDr Desiree Ellis wenze izinguquko eziningi ngesiwombe sesibili ukunikeza abanye abadlali ithuba.
Unozinti, uSwart naye akawuqedanga umdlalo njengoba ekhishwe uMoletsane weRoyal AM Ladies FC. UDineo Magagula weTS Galaxy Queens FC kuphela ongadlalanga namuhla koNozinti.
Manje iBanyana Banyana izobuyela eNingizimu Afrika. IHollywoodbets Super League izobuya kule mpelasonto futhi wonke amaqembu azobe edlala imidlalo yeligi kule mpelasonto.
