Letinsha nga-Mabasa alibangisa kulelase-Morocco
Lowake waba ngumgadli we-Orlando Pirates, Tshegofatso Mabasa, kubikwa kutsi sekusele kancane kakhulu kutsi acedzele sivumelwano sekutsi.ajoyine licembu laseMorocco.
Ngekwemibiko lephuma eMorocco, iMas Fés ifuna kusayina lomgadli ngaphambi kwekucala kwesizini ya-2026/27.
Lomgadli loneminyaka lengu-29 budzala usale anganacembu ngemuva kwekutsi angavumi kusayina inkontileka lensha ne-Stellenbosch.
Kubikwa kutsi utsatse lesincumo ngoba afuna inselele lensha ngaphandle kweNingizimu Afrika.
Uma yonkhe imininingwane yalesivumelwano icedzelelwa njengobe kusalimdziwe, Tshegofatso Mabasa utawuba ngulomunye webadlali bakulelive labatawudlala kuligi yase-Morocco ngalesizini letako.
Lomgadli ushiya iBetway Premiership ngemuva kwekutakhela ligama njengalomunye webagadli labakhaliphe kakhulu ehlangotsini laphambili.
Kudlala kwakhe eMas Fés kulindzeleke kutsi kumnike litfuba lekutikhombisa ebholeni lase-Afrika futsi kube sicalo lesisha emsebentini wakhe.
FUNDZA NALANA: I-Banyana Banyana ihlome ngalendlela kulowe Wafcon 2026
Balandzeli batawulindzela simemetelo lesisemtsetfweni sekuphotfulwa kwalesivumelwano.
