Nangu nozinti weChiefs asikitana nemlandzeli
Seyisuse inkhulumo netindzaba levidiyo levetwe ku-X lekhombisa lomunye webadlali beKaizer Chiefs asikita umlandzeli ngesincandza sempama.
Lesehlakalo lesi lesimangalisako kutsiwa senteke ngemuva kwalomdlalo weNedbank Cup wangaLwesitsatfu ebusuku eDHL Stadium eKapa.
Kulomdlalo iKaizer Chiefs ihlulwe nga 2-1 licembu le Stellenbosch FC lokucedze emaphupho ekuvikela lesicoco lesancotjwa iChiefs ngesizini lendlulile.
Kule vidiyo lefakwe ngu-@Constitution_94, kuvela nozinti Brandon Petersen ahishana nebalandzeli ngemuva kwalomdlalo.
Kubese sekuba khona lochamuka sekamtsela ngalokubukeke kusamanti , wabe kayisusile.
Petersen ubese ke ushiya laba bekakubo wacondza kuye, wabonakala kutsi ukhuluma naye noma bekungavakali kutsi bekutsiwani kodvwa ukhulume ngatsi bekamtfuka.
Ubese ulula sandla akhombisa kwekutsi ufuna kumdvonsa ngemphama, kodvwa wabese uyatibamba watehlisa wamyekela.
Akucaci ke kutsi iphelelephi lendzaba yabo. @Constitution_94 uyikhaphe ngembhalo agceka balandzeli beChiefs ngalentfo lebayente kunozinti lovimbe kahle isizini yonkhe.
