Unozinti weBafana Bafana angase asayine inkontileka ende nePirates

I-Orlando Pirates FC ifuna ukunika unozinti wayo wokuqala uSipho Chaine inkontileka entsha njengoba esezibonakalise ukuba yiqhawe leqembu labo, ngokusho kwe-Idiski Times.

UChaine, 27, ujoyine i-Orlando Pirates FC ngoSepthemba 2022. AmaBhakabhaka asayine lo nozinti onekhono kwiChippa United FC lapho adlale imidlalo emibili kuphela yeligi.

Ngesizini yakhe yokuqala namaBhakabhaka uChaine ukwazile ukunqoba iMTN8 Cup neNedbank Cup kwiPirates. Bahlule AmaZulu FC kowamanqamu weMTN8 Cup kwathi kwiNedbank Cup banqoba bebhekene neqembu lasePolokwane iSekhukhune United FC.

Khonamanjalo, ngesizini edlule uChaine ube yiqhawe lamaBhakabhaka ikakhulukazi kwiMTN8 Cup. Usize iqembu lakhe lanqoba iNedbank Cup neMTN8 Cup.

Kowamanqamu weMTN8 Cup ubambe amaphenathi amathathu eMoses Mabhida Stadium, eThekwini bebhekene neMamelodi Sundowns FC. Uphinde wahlabana ngendondo yeMTN8 Cup ‘Player of the Tournament.’

UChaine uqhubekile nokwenza umsebenzi omuhle nakule sizini njengoba amaBhakabhaka asefuna ukumnika inkontileka entsha. Usanda kusiza amaBhakabhaka ngokukunqoba isicoco seMTN8 waphinde wadlala kwiBafana Bafana okokuqala.