Abaqeqeshi abasha beChiefs sebefikile eNaturena
Abaqeqeshi ababili abasha beKaizer Chiefs sebefikile eNingizimu Afrika kanti manje baseNaturena ukuzoqala umsebenzi wabo.
Abaqeqeshi ababili okunguFernando Da Cruz no-Ilyes Mzoughi bafike eNingizimu izolo. Ngokusho kweFarPost uDa Cruz ufike kuleli ngezithuba zabo-10:00 ekuseni kanti uMzoughi ufike kusihlwa ngo-19:00.
Laba baqeqeshi ababili bazoletha isipiliyoni esikhulu eNaturena njengoba siya kusizini ka-2024/25. UDa Cruz uzoba ngumsizi womqeqeshi kuthi uMzoughi abe ngumqeqeshi wonozinti kuMakhosi ngesizini ezayo.
Umsizi womqeqeshi waMakhosi beku nguDillon Sheppard osebenze noNtseki Molefi noCavin Johnson ngesizini edlule. Umqeqeshi wonozinti beku ngu-Aubrey Mathibe ofike eNaturena ngo-2022.
Bobabili laba baqeqeshi [uSheppard noMathibe] baphinde basebenza nowayengumqeqeshi weKaizer Chiefs u-Arthur Zwane ngesizini ka-2022/23. Ngeshwa, u-Arthur Zwane akazange abuyele eqenjini lokuqala leChiefs njengoMqeqeshi Omkhulu ngesizini ka-2023/24.
Laba baqeqeshi ababili [uDa Cruz noMzoughi] bazosebenzisana noNasreddine Nabi kuMakhosi ngesizini ezayo. UNabi akakafiki eNaturena kanti izolo ubedlala umdlalo owandulela owamanqamu weMoroccan Throne Cup ne-AS FAR.
Ngenhlanhla, iqembu lakhe liphumelele ngo 2-0 libhekene neMAS Fés. Leli qembu lizodlala owamanqamu nowinile phakathi kwe-Raja CA ne-MC Oujda. I-Raja CA ne-MC Oujda bazobhekana e-Stader Adrar kusasa ngo-21:00.
