ABDESLAM UBONA LIKUSASA LELIHLE KU-MBUTHUMA
Umceceshi we-Orlando Pirates Abdeslam Ouaddou ubona likusasa lelihle kulomdlali lomncane longumgadli waphambili Yanela Mbuthuma. Utsi lomceceshi Mbuthuma usatawutfutfuka njengobe sekakhone nekubhalisa emagoli kulelicembu le-Orlando Pirates.
Lomdlali loneminyaka le-23 ngebudzala ujoyine lelicembu lase-Soweto asuka ku-Richards Bay ekucaleni kwalesizini lesikuyo nyalo, lomdlali ucedze isizini yakhe nelicembu le-Richards Bay angumdlali losetulu ngemagoli, ngiko lokubange lomdlali wadvonsa mehlo tukwemacembu lamanyenti.
Mbhuthuma ungene asuka ebhentjini washaya emagoli lamabili kulomdlalo we-CAF Champions League lapho bancobe khona licembu lase-Lesotho i-Lioli ngemagoli la-4-0.
Ouaddou ushayele lomdlali lihlombe wancoma ligalelo lakhe, wabika kwekutsi lomdlali unelikusasa lelihle, usinkhwa sakusasa.
“Mbuthuma uyincenge yebadlali lebanelithalente lelicakatile e-Ningizimu Afrika. Litiko letema-scouts alelicembu lisebente kakhulu kusitfolela lomdali lomuhle enkhundleni, nyalo sisamlungiselela kwkutsi abengumgadli lomkhulu kulelicembu.”
Lomunye mdlali lojabulise Ouaddou ngu-Sipho Mbule lodlala sisu noma ekhatsini kulelicembu, lomceceshi ubona umsebenti waMbule amuhle kakhulu kulelicembu.
“Lengikutsandzako ngaMbule kutsi udlala amoyitela. Ungumdlali lomuhle kakhulu kantsi futsi ungumdlali lomkhulu losezingeni lelisetulu kuleligi. Ngako ke umangabe ajabulile nami ngiyajabula.”
