‘Amakhosi ajabulile’ Phili ukokota emnyango wase-Naturena
I-SABC Sport ingembula kutsi iKaizer Chiefs seyitsatse sinyatselo lesikhulu sekusayina umdlali weliphiko weStellenbosch FC, Langelihle Phili, ngemuva kwekutsi lamacembu omabili afinyelele esivumelwaneni sekutsengiselana lomdlali.
Lomsakato wesive utfola kutsi tinkhulumo tisheshe tachubeka kuleliviki ngemuva kwekutsi iChiefs yenyuse sipho sayo emvakwetingcoco letinyenti etibandzakanye kutsengiselwana kwebadlali kanye nemali.
Ekucaleni, tingcoco betihlelwe ekufakweni kwemgadli Ashley du Preez kanye nalomunye umdlali kulesivumelwano, kodvwa iStellenbosch beyisolo ingakakulungeli kumkhulula, ikhetsa kutsi aye phesheya nobe acedze inkontileka yakhe.
Kodvwa-ke, timphawu tikhomba kutsi lamacembu omabili nyalo sekavumelene ngetintfo letimcoka talokutsengiselana, nanobe kusakhona nje tintfo letincane letisadzinga kulungiswa ngaphambi kwekutsi kuphetfwe.
Nangabe letintfo letisasele tilungiswa, iKaizer Chiefs itawuba sematfubeni lamahle kakhulu ekucedza kusayina Phili ngaphambi kwekuvalwa kweliwindi lekudluliswa kwebadlali ngeNyoni.
Kubikwa kutsi Langelihle Phili uhlonishwa kakhulu
ngumcondzisi wetebhola Kaizer Motaung Jr kanye nemceceshi Fernando da Cruz, lofuna umdlali wasemaceleni lonelikhono lekudlala etindzaweni letinyenti, kungaba semaceleni nobe ngemuva kwemgadli.
FUNDZA NALANA: Ekugcineni i-Bucks iyaphumelela kusayina Thapelo we-Stellies
Nanobe lesivumelwano singakacedzelelwa ngalokusemtsetfweni, lokwentekako nyalo kubeka iKaizer Chiefs njengelicembu lelihamba phambili ekusayineni lomunye webadlali labahlaselako labanelithalente lelikhulu kuBetway Premiership.
Story by Nkosinathi
