Broos acwayisa bafana bakhe nge-Korea: “ngatsi ma-bhedri”
Ngemuva kwekutsi iBafana Bafana ivuse litsemba ngekudlala ngekulingana naga-1-1 ne-Czechia,
Broos ucwayise bafana bakhe ngemsebenti lobalindzile ne-South Korea.
I-Bafana Bafana ibuye ngemandla ngemuva kwekutsi idliwe nga-2-0 iMexico kulomdlalo wekucala.
Broos wente tingucuko wafaka badlali labahlasela ngemandla, badlali labafana na-Thapelo
Maseko kanye na-Oswin Appollis. Loku kwente bakhona kuhlasela kakhulu.
Lephenathi ya-Teboho Mokoena ngiyo leletse litsemba kulelicembu, bakhone kukoleka liphuzu linye kulomncitiswano weNdzebe yemhlaba.
Nyalo mehlo acondze ngco kulomdlalo wabo ne-South Korea. Kuncoba kulomdlalo ngiko lokutawusita
kutsi iBafana Bafana ikhone kuchubekela phambili.
Umceceshi Hugo Broos utsi, i-Korea ayifani ne-Mexico noma ne-Czechia.
“I-South Korea ilicembu lelinesiyalo lesikhulu kakhulu. Loku kulikhono lemacembu lamanyenti
aseMpumalanga.
“Banebadlali labayingoti futsi labadlalela emacembu lasezingeni lelisetulu kakhulu,” kusho Broos.
Kondvwa intfo lemtfuse kakhulu lomceceshi kungalendlela i-South Korea igijima ngayo.
“Ngiyacolisa kusho loku, kodvwa bayafana nemabhedri e-Duracell,” kuchubeka lomceceshi.
“Uyawafaka bese agijima intfo lengapheli. Agijima imizuzu leyi-90’ angaphumuli,” kuchubeka yena.
Lamavi Broos uwakhuluma nje, iBafana Bafana iyati kwekutsi ayikho lenye indlela leya empumelelweni
ngaphandle kwekutsi ishaye i-South Korea.
FUNDZA NALANA :Khalil ngetinsolo tekudla Nabi titsendze ku-Chiefs
Story by Nkosinathi
