I-Sundowns ikhetse lowake wagajwa yi-AmaZulu esikhundleni lesikhulu

Bompetha base-Afrika, iMamelodi Sundowns, bachubeka nekucinisa umnyango wabo wekuhlola badlali ngekukhetsa lowake wagajwa yi-AmaZulu FC.

Sekuvele kutsi iSundowns ikhetse Pedro Dias
kutsi abe yinhloko lensha yemnyango wekuhlola badlali (Head of Scouting).

Ngekubika kweSoccer Laduma, lesikhulu sasePortugal, lebekanguMcondzisi Webhola (Director of Football) kuMaZulu, sesijoyine iSundowns.

“Yebo, sewujoyine lelicembu,” kusho umtfombo locashunwe kulombiko ngaLesibili.

Kubikwa kutsi iMamelodi Sundowns yalile kuphawula ngesikhatsi icelwa kutsi icinisekise ngaloludzaba ngalokusemtsetfweni.

Dias usale anganalo licembu ngemuva kwekuhlukana neAmaZulu ekupheleni kwesizini leyengcile, lapho asebente khona iminyaka lemibili.

Emsebentini wakhe lomusha, utawuhola luhlelo lweSundowns lwekufuna nekuhlola ematalenta aseNingizimu Afrika kanye nakulamanye emave.

Ngekwelwati loluku-LinkedIn yakhe, Dias ungumphatsi webhola lonelwati lolubanti ebholeni lemhlaba.

Usebente ePortugal, eCanada, e-United States, eNew Zealand naseNingizimu Afrika.

Ngaphambi kwekujoyina AmaZulu, wake wasebenta njenge-Technical Director kuVancouver Whitecaps FC yaseCanada, waphindze wasebenta ku-academy yeSporting CP yasePortugal.

FUNDZA NALANA: Tso Vilakazi akamboni Phili aba liLangelihle ku-Kaizer Chiefs

Kukhetfwa kwakhe kukhombisa kutsi iMamelodi Sundowns ichubeka nekucinisa tonkhe tinhlaka tayo njengoba ihlose kuchubeka nekubusa ebholeni laseNingizimu Afrika kanye nase-Afrika.

Story by Nkosinathi Masinga