Injabulo e-Eastern Cape kwazise izoba namaqembu amabili kuPSL
Isifundazwe sase-Eastern Cape sesizoba namaqembu amabili kuPremier Soccer League [PSL] ngesizini ezayo kwazise iHighbury FC isikhuphukele kuMotsepe Foundation Championship.
IChippa United FC kuphela ebidlala kuPSL e-Eastern Cape. Lesi sifundazwe sigcine ukuba namaqembu amabili kuPSL ngesizini ka-2020/21 kudlala iBizana Pondo Chiefs FC.
Leli qembu [iBizana Pondo Chiefs FC] likhushulelwe kwi-ABC Motsepe League laya kuMotsepe Foundation Championship ngesizini ka-2019/20. Le kilabhu iwine i-Eastern Cape ABC Motsepe League ne-ABC Motsepe League National Playoffs ngaleyo sizini.
Ngeshwa, ngesizini elandelayo bagawulwe yizembe baya ku-Eastern Cape ABC Motsepe League. Manje, iHighbury FC yase-Eastern Cape ePort Elizabeth ikhushulelwe kwiMotsepe Foundation Championship.
Le kilabhu iwine i-Eastern Cape ABC Motsepe League ngemuva kokuhlula iSinenkani FC ngeSonto. Ngemuva kwalowo mdlalo ngeSonto balibangise e-Upington bafike ngoMsombuluko.
NgoLwesibili idlale neMangaung FC yanqoba ngo 1-0, kwathi ngoLwesithathu yadlala ngokulingana ngo 0-0 neThames FC. Namuhla [ngoLwesihlanu] ihlule iqembu elizinze eKZN iNjampela FC ngo 2-1 kowandulela owamanqamu ukuze ikhuphukele kuMotsepe Foundation Championship.
Leli qembu selizobhekana neKruger United FC kowamanqamu ngeSonto. Womabili la maqembu [iHighbury FC neKruger United] akhushulelwe kuMotsepe Foundation Championship.
Womabili iHighbury FC neChippa United FC badabuka ePort Elizabeth e-Eastern Cape. Lawa ngamaqembu amabili ase-Eastern Cape azobe edlala kuPSL ngesizini ezayo. IChippa United izobe ikwiDStv Premiership kuthi iHighbury FC ibe kuMotsepe Foundation Championship.
