IPirates ifuna ukuqinisa iqembu layo ngomdlali wasemuva weStellies

I-Orlando Pirates FC ikhombise intshisekelo yokuthenga umdlali wasemuva weStellenbosch FC kanti uThabiso Monyane angase afudukele kwiStellies uma iBucs imsayinisa lo mdlali.

I-Orlando Pirates FC ifuna ukuqinisa iqembu layo kwesokudla emuva kanti ngokwe Kickoff amaBhakabhaka afuna ukusayinisa ukaputeni weStellies uDeano Van Rooyen. Lokhu kungase kube yisivumelwano sokushintshana, uMonyane angase aye kuStellies kanti uVan Rooyen angase aye kumaBhakabhaka.

IStellenbosch FC iqale ngesizini edlule ukukhombisa intshisekelo yokusayinisa uMonyane. AmaBhakabhaka abe nenkinga ohlangothini lwesokudla emuva ngesizini edlule. Kulimale uShandu noMonyane kanti amaBhakabhaka anqume ukusebenzisa uMakaringe kwesokudla emuva.

IPirates iphinde yanquma ukuthenga uThabiso Lebitso kuChippa United FC njengoba bebedonsa kanzima kwesokudla emuva. Le kilabhu iphinde yaphakamisa umdlali wayo osemncane uJabulani Mokone ogijima kuDStv Diski Challenge [DDC] kodwa wangadlala.

UVan Rooyen ube nesizini enhle ngesizini edlule futhi uqokwe ‘kuDStv Premiership Defender of the Season Category’ ehambisana noThapelo Xoki we-Orlando Pirates FC kanye nomdlali wasemuva weBafana Bafana neMamelodi Sundowns FC uGrant Kekana.

IBhakabhaka selisayinise omunye umdlali uSelaelo Rasebotja obekwiSuperSport United FC. Lo mdlali usayine inkontileka yeminyaka emithathu namaBhakabhaka.

IPirates ihlukene nabadlali abafana noRichard Ofori, Siyabonga Mpontshane, Makaringe, Marou, Monare noRomeo Erasmus. IPirates inqume ukungazivuseleli izinkontileka zalaba badlali.