I-Chiefs iphindze yabanjwa kulowekutiva mandla e-Spain

I-Kaizer Chiefs iphindze yadlala ngokulingana emdlalweni wayo wesibiliwebungani e-Spain ngemuva kwekubambana nge 1-1 ne-Al Kholood yaseSaudi Arabia ngaLesitsatfu ekuseni.

Emakhosi angene kulomdlalo afuna kunqoba kwekucala eluhambeni lwawo lwaseYurophu ngemuva kwekubambana ne-Glasgow Rangers nge 1-1 ngemphelasontfo.

Kulomdlalo, iChiefs icale kahle lapho Wandile Duba ashaye khona ligoli ngemzuzu we-15, wabeka licembu lakhe embili.

Emakhosi aye ekhefini ahamba embili nge 1-0 futsi bekubonakala kutsi atawugcina lomphumela aze awunqobe lomdlalo.

Kodvwa i-Al Kholood yakhona kushaya ligoli lekulinganisa ngemzuzu we-82, kwagcina sekuphela umdlalo kubambene nge 1-1.

Lona bekungumdlalo wesibili lolandzelanako lapho i-Kaizer Chiefs yehluleka khona kubambelela ekuholeni kwayo yaphindze yagcina idlale ngekulingana.

Nasemdlalweni wayo ne-Glasgow Rangers yaseScotland ngemphelasontfo, iChiefs yadedela ligoli sekusondzele kuphela umdlalo, yagcina idlale ngokulingana nge 1-1.

Emakhosi atawucedza luhambo lwawo lwaseSpain ngemdlalo ne-Elche CF yaseLaLiga ngaMgcibelo.

Ngemuva kwekubuyela eNingizimu Afrika, i-Kaizer Chiefs itawubhekana nebacudzelwane base-Zimbabwe, iScottland FC.

Lomdlalo we-Toyota Cup utawudlalelwa eRoyal Bafokeng Sports Complex e-Rustenburg ngaJulayi 26, futsi nguye lotawuba ngumdlalo wekugcina wemalungiselelo alesizini letako.

Story by Nkosinathi

  FUNDZA NALANA: I-Pirates itawudlala nelase-Spain, iveta lawungayibukela khona