ISundowns iphinde yazitapela kwiRoyal AM
IMamelodi Sundowns FC ihlule iRoyal AM FC okwesibili ezinsukwini ezine kusihlwa eHarry Gwala Stadium, eMgungundlovu emdlalweni weDStv Premiership.
AmaBrazilians eze kulo mdlalo ehlule iThwihli Thwahla ngo 1-0 ngoMgqibelo eLoftus Versfeld Stadium, ePitoli. UPeter Shalulile ushaye igoli lokuwina ngomzuzu ka-85.
Namuhla kusihlwa amaBrazilians anqobe ngo 2-0 kuThwihli Thwahla. UPeter Shalulile oshaye igoli lokuwina ngoMgqibelo ushaye igoli lokuqala kusihlwa ngomzuzu ka-41. Isiwombe sokuqala siphele ngegoli eqandeni.
ULesiba Nku ushayele amaBrazilians igoli lesibili ngomzuzu ka-74 ngesiwombe sesibili kulo mdlalo. Lelo kube yigoli enqobe ngalo iMamelodi Sundowns ngesikhathi inqoba ngo 2-0.
IMamelodi Sundowns isalokhu ingakahlulwa emidlalweni engu-27 yeligi kule sizini ngaphansi komqeqeshi uRulani Mokwena. Banqobe engu-21 badlala ngokulingana imidlalo eyisithupha. Le kilabhu inamaphuzu angu-69 emidlalweni engu-27.
Umdlalo wabo olandelayo weligi bazowudlala neStellenbosch FC ngoMgqibelo. Kokugcina la maqembu ebhekene koweDStv Premiership iSundowns yanqoba ngo 3-1 wamagoli kaKekana, Modiba noMabena eLucas Moripe Stadium. Igoli leStellies lishaywa nguTitus.
