Mahlebo lasematseni ngaKhuliso Mudau ne-Pirates

Lenye yetindzaba letisematseni ngemahlebo ekusayinwa kwesihlabane se-Sundowns licembu le-Orlando Pirates.

Lamahlebo acine kakhulu kulandzela kwekutsi iSundowns ikhonile kuncenga ngempumelelo yekutsi iPirates  iyitsengisele Monnapule Saleng. 

Ngemuva nje kwekuvumbuka kwaletindzaba leti, kubese sekuvumbuka emahlebo ekutsi Khuliso Mudau akamange avuselele inkontileka kule-Sundowns ngoba  ufuna kuya kule-Pirates. 

Kodvwa kutse ngeMsombuluko ekuseni sikhulu lesibukene netokuchumana nabetindzaba kule-Sundowns Shupi Nkgadima wakucitsa konkhe loku.

Naloku nje  akakakwenti ngendlela lesemtsetfweni   nelicembu/netinkhundla tokuchumana njengenjwayelo.

Kodvwa ufake sitfombe saKhuliso Mudau atifundzela nje incwadzi yebantfwana   yetinganekwane ku-WhatsApp Status sakhe wabese usipheleketela ngembalo lotsi: ‘Inganekwane’.

Lombhalo wakhe kuvele kwacaca kutsi ucondze ngco kulamahlebo  lakhona ngaMudau nePirates lokuvela kutsi nayo ingagcuma imtsatse uma kuvela litfuba lekumsayina.

Mayelana nalamahlebo, Mudau usetinyangeni letiSitfuba tekugcina kwinkontileka yakhe neSundowns njengoba kunguBhimbidvwane nje.

Loku kusho kutsi sewuvumelekile kutsi angasayina ikontileki yekubambisa nanoma nguliphi lelinye licembu lekafusa kulijoyina  uma kuphela ikontileki yakhe ngeNhlaba.

Kutawukhumbuleka kutsi Mudau uke wahlala angajimi futsi angadlali kuSundowns ngasekucaleni kwesizini ngenca yekungavumelani ngekontilaki lensha.