Matlou nelicembu lelisha ngemuva kwekuhlukana ne-Chiefs

Lobekangumdlali wasesiswini we Kaizer Chiefs George Matlou utfole likhaya lelisha ngemuva kwekuhamba kwakhe eNaturena.

Matlou sewujoyine iStellenbosch FC ngalokusemtsetfweni ngaphambi kwesizini ya 2026/27.

Lomdlali loneminyaka lengu-28 ngebudzala wehlukane ne-Amakhosi ekupheleni kwenyanga yeNhlaba ngemuva kwekutsi inkontileka yakhe iphele futsi lelicembu lancuma kungayivuseleli.

Kubikwe evikini leliphelile kutsi Matlou ufike eNshonalanga Kapa kute ayohlolwa licembu lebaceceshi lase Stellenbosch leliholwa ngu-Gavin Hunt.

I-Stellenbosch icinisekise kutsi lomdlali utawusayina
inkontileka yesikhatsi lesidze.

Lomdlali wajoyina iKaizer Chiefs ngemuva kweminyaka lemine, lapho khona wakhona kusita lelicembu kutsi lincobe iNdzebe ye-Nedbank—indzebe yabo yekucala ngemuva kweminyaka lelishumi.

Kepha lesizini leyengcile ayizange ihambe kahle kuye ngenca yekulimala lokwamenta wahlala sikhatsi lesidze angadali, ekugcineni kwaholela ekuhambeni kwakhe.

FUNDZA NALANA: Da Cruz nemlayeto locinile kubalandzeli be-Chiefs

Ngesikhatsi sakhe e-Naturena, Long and Short udlale imidlalo leyi-46 kuyo yonkhe imincintiswano.

Ngembi kwekutsi ajoyine iKaizer Chiefs, George wadlalela iSwallows FC kanye nelicembu lase Portugal iSanjoanense.

Kulapho wadvonsa khona emehlo ku-Amakhosi scouts laphindze amletsa eNaturena ngemuva kwaloko.

Story by Nkosinathi