MAYO UCITSE LIBHODVO LONKHE LEMSHIBO
Licembu le-Kaizer Chiefs belicudzelana nelicembu le-Amazulu e-FNB Stadium ngolwesitsatfu entsambama ngesnsimbi ye-19h00.
Lomdlalo udlale ngekulingana-1-1 phakatsi enkhundleni, licembu le-Kaizer Chiefs litfole ematfuba lamanyenti esigabeni sekucala salomdlalo. Lilepo utfole litfuba bamvimba ngu-Johnson lotfole i-Man of the match ekugcineni kwalomdlalo.
Ngcobo naye utfole litfuba kodvwa Jonhson waphindza futsi wasebenta, i-Amazulu yona itfole litfuba yatfola ligoli ngebhola lefakwe ngenhloko ngu-Ngwenya. Lilepo uhluleke iphenathi, kwatsi Mduduzi Shabalala watfola ibhola lebuye ku-Pule Modi washaya ligoli lelihle walinganisa lomdlalo.
Kutse esigabeni sesibili salomdlalo Modi watfola litfuba ngebhola ledlalwe ngekuphutfuma, wayishaya itse kusele nje kancane kutsi yece mugca ingene Mayo lobeka offside wayicedzisa, nomphemphe watsi i-Offside ligoli alimange libalwe mdlalo wachubeka ngekulingana (1-1).
Umceceshi we-Kaizer Chiefs Khalil Ben Youssef akamange atfukutsele ngalomdlali kodvwa umesekile ngemuva kwekuphela kwemdlalo ukhulume kube-SABC watsi,
“Kundzima/kumatima kakhulu kulabadlali, ngekwengcondvo, umangabe uhluleka iphenathi kodvwa sachubeka salwa, sitfole ligoli nga Shabalala, futsi satfola lelinye litfuba, sagolisa, kumele ngabe kubeligoli kodvwa Mayo wayitsintsa lebhola asehlangotsini lekuba-offside.
“ kodvwa ngicabanga kutsi bekusifanele kuwina, Ngijabulile ngalendlela sidlale ngayo, kantsi ke miphumela itawuta njengobe sikhatsi sihamba,”mavi lakhulunywe ngumceceshi lisekela we-Kaizer Chiefs Khalil Ben Youssef.
