Ouaddou ucasuke ‘wagana lunwabu’, acwayisa badlali be-Pirates
Umceceshi we-Orlando Pirates, Abdeslam Ouaddou, akazange akufihle kudvumala kwakhe ngemuva kwekutsi licembu lakhe lidlale 1-1 ne-AmaZulu FC.
Lamacembu ahlangana emdlalweni weBetway Premiership lobewuseKings Park Stadium eThekwini ngeaLwesitsatfu ebusuku.
IPirates yacala kahle yaze yahola ngeligoli laTshepang Moremi, kodvwa yehluleka kusebentisa ematfuba lamanyenti lebawawatfolile.
Yanela Mbuthuma naGhampani Lungu bayincenye yebadlali labaphutselwe ngematfuba labalulekile.
Loko kunike AmaZulu litfuba lekubuyela emdlalweni, futsi Thandolwenkosi Ngwenya washaya iphenathi ngasekupheleni kwesiwombe sekucala.
Ouaddou uvumile kutsi iPirates ayizange idlale kahle nhlobo esiwombeni sekucala.
“Uma ngikhuluma liciniso, ngiyalitsandza licembu lami, kodvwa ngicabanga kutsi besifanelwe ngilokungenhla, ikakhulukati uma ubuka ematfuba lesiwatfolile esiwombeni sesibili,” kusho yena.
“Angifuni kukhuluma ngesiwombe sekucala ngoba besisibi kakhulu.”
Lomceceshi utsi iPirates bekufanele ihambe nemaphuzu lamatsatfu, kodvwa wancoma I-AmaZulu kanye nemceceshi wawo, Arthur Zwane, ngekwenta umdlalo waba matima.
“Angicabangi kutsi manyenti emacembu latawuta lapha bese ayancoba. I-AmaZulu licembu lelicinile, futsi linebadlali labasezingeni lelisetulu,” kusho Ouaddou.
Uphindze wancoma Zwane, watsi ungulomunye webaceceshi labahamba embili kuPSL.
FUNDZA NALANA: We-Stellenbosch FC Uhlonipha i-Left-back ye-Pirates lensha
Nanoma, Ouaddou ukhiphe emavi lacinile ecasukela labanye badlali bePirates, abecwayisa kutsi kumele bavuke.
“Kumele sivuke. Labanye badlali kumele bavuke masinyane.”
Uphindze wancoma Nkosinathi Sibisi naSipho Chaine ngekutinikela kwabo.
“Kumele ngincome Sibisi naChaine. BebakuNdzebe yeMhlaba futsi nyalo badlala yonkhe imidlalo,” kusho yena.
“Kodvwa labanye kumele bavuke ngoba mine anginaso sikhatsi. Nyalo sekusimo lesiphutfumako.”
Story by Nkosinathi Masinga
