Rulani ugcine aphendvula kulamabala bekabekwa iSundowns
Lendzaba yetinsolo etentiwe iMamelodi Sundowns ngaRulani Mokwena seyitsatse sigaba lesinye njengoba lomceceshi sekatiphendvulele.
Ngaphambi kwemdlalo loshubile weCaf Champions League lotawutsatsa indzawo eLoftus Stadium, lo mceceshi weMC Alger ugcine seka phawulile.
Ukhulume kabanti ngekumiswa kwemhlatiyi weSundowns Mario Masha ngetinsolo tekutsi umhlebele imfihlo nalolunye lwati ngalelicembu.
Mokwena utse uphawula nje ngoba ufuna kuvikela kulunga kwakhe, nebuncwethi balelicembu lakhe lase-Algeria.
Futsi uvete kukhatsateka kakhulu ngekufakwa etindzabeni “lokungekho emtsetfweni” kwemilayeto lesemkhatsini kwebantfu lababili lokuyicala eNingizimu Afrika.
Mokwena ucitse noma ngabe ngiwaphi emahlebo lafaka phakatsi kuhlebelwa ngetinhlelo talomdlalo lotawudlala ngelusuku letitsandzane.
LOKUSHIWO NGU-
Ukhale ngekutsi letinsolo tifaka kudzelela umsebenti wakhe nelitsimba lakhe lekasebentisana nalo kuMC Alger.
“Asikaze satfola lwati ngemacebo nanoma ngabe ngiwuphi umbhalo ngeSundowns…
“Noma ngabe ngiwaphi emacebo kanye nemahlebo lachamuka ngaphandle umasiwatsatsa siwabukele sitawube singasalihloniphi lelicembu lelikhulu.
“Sitilungiselela kahle — ngekwenta lucwaningo nekusebenta kamatima — futsi asidzingi lusito lwangaphandle nakancane.”
Licembu leMamelodi Sundowns litawucudzelana ne MC Alger ngemhlaka 14 Indlovana, umdlalo we-CAF Champions League.
By: Nkosinathi
