Sekubikwe letibuhlungu nga-Adams asishiya emhlabeni
Ummango webhola letinyawo eNingizimu Afrika usale utfukile ngemuva kwetindzaba tekushona kwemdlali wasesiswini weBafana Bafana ne-Mamelodi Sundowns loneminyaka le-25 ngebudzala, Jayden Adams.
Adams bekasandza kumelela iNingizimu Afrika kuNdzebe yeMhlaba, lapho akhombise khona lithalenta lakhe esigabeni lesiphakeme semncintiswano lomkhulu webhola letinyawo emhlabeni.
Imininingwane lephatselene nekushona kwakhe isolo ayikacaci kulesigaba. Kepha iLisenethini itfole kutsi kutinsolo utsite watibulala ngemuva kwekucabana nentfombi yakhe.
Ngekusho kwembiko we-Soccer Laduma, umphatsi walomdlali ucinisekisile kutsi sewudlulile emhlabeni.
IMamelodi Sundowns nayo yatsintfwa mayelana naloludzaba, kepha ayizange icinisekise futsi ayizange iphike letinsolo.
Esikhundleni saloko, lelicembu licele kutsi umndeni wakhe uniketwe sikhatsi nendzawo kulesikhatsi lesimatima.
Umphatsi waJayden Adams, Brendine Johnson, ukhulume egameni lemndeni, aveta buhlungu lobukhulu lobuvakala kulabo labasondzelene nalomdlali.
FUNDZA NALANA: Sicakacaka ku-Chiefs bashiya Lilepo balibangise e-Spain
“Sisebuhlungwini lobukhulu nyalo.
Umndeni awukakulungeli kukhuluma nanoma ngubani njengoba usatfukile.Lokushona kushiye wonkhe umuntfu ephuke inhlitiyo.
Bekasandza kubuya eNdzebeni yeMhlaba ngesikhatsi kufika letindzaba letibuhlungu,” kushoJohnson.
“Ngikhulume naye ngaLesine. Bekajabulile futsi alindzele kubuyela kulelicembu ngemuva kweNdebe yeMhlaba, njengoba atisungule njengemuncobi weCAF Champions League futsi alungele tinsayeya tesikhatsi lesitako.
Bekatsandza kucitsa sikhatsi nemndeni wakhe. Ngilahlekelwe ngemagama nyalo. Sicela nje kutsi imfihlo yemndeni ihlonishwe.Ngingacinisekisa kutsi sewushonile. Kute lobekakulindzele loku.
“Jayden Adams watakhela ligama ngesikhatsi adlalela iStellenbosch FC ngaphambi kwekutsi ajoyine iMamelodi Sundowns, lapho aphindze watfola khona indzawo elicenjini lesive, iBafana Bafana.
Kudlala kwakhe kuNdebe yeMhlaba lesandza kwentiwa kukhombise kutsi ungulomunye webadlali labachubeka nekukhula ebholeni letinyawo lase Ningizimu Afrika.
Ezemidlalo2002 yendlulisa emavi ayo endvudvuto kumndeni waka-Adams, kuMamelodiSundowns, kuBafana Bafana, kanye nawo wonkhe ummango webhola letinyawo.
Story by Nkosinathi
