SIYABONGA NOMVETHE UCHAZA NGEMEHLUKO LOKHONA KUYE NA-SHALULILE

Umdlali lomkhulu lokewadlalela i-Kaizer Chiefs Siyabonga Nomvethe ubika mehluko lokhona kuye na-Peter Shalulile lophule lilekhodi lakhe lekuba nemagoli lamanengi kubandlula bonkhe labake badlala ku-PSL.

Shalulile uphule lilekhodi lelibekhona minyaka le-6 lemagoli la-129 lashatjwe mdlali lokewadlalela nelicembu lesive i-Bafana Bafana, kantsi futsi bekumfanela.

Nomvethe uchazele be-Diski Times ngemehluko noma ngekungafani kwakhe nemdlali wase-Namibia, sitayela sabo sekudlala, emadla, likhono kanye nedlela yekudlala.

“Asifane vele ngalokuphelele ngoba ute titayela nematubane lebenginawo.” Nomvethe utjele be-Diski Times.

“Akakhoni ku-drebula noma kubamba ibhola ngemuva ngalendlela bengenta ngayo. Kodvwa  ehlangotsini lakhe, uyakhona kutihlela noma kuhleleka enkhundleni ngaso sonkhe sikhatsi futsi uyakhona kutfola Inetha.”

Shalulile unemagoli la-130 kwanyalo ulandzelwa ngu Bradley Grobler we-Sekhukhune United nemagoli la-121, Nomvethe ulindzele emagoli lamaningi kulomdlali we-Mamelodi Sundowns.

“Bukela, yena usadlala, futsi angati utochubeka ashaye ngaki wemagoli. Ngicinisekile kwekutsi utochubeka ashaye emagoli lamanyenti. Isizini ye-Ligi isandza kucala, ngako-ke utongeta emagoli lamanyenti.”