Thalente Mbatha uvumbula lokuhlelwe iPrates kuligi
Umdlali we-Orlando Pirates, Thalente Mbatha utfumele sicwayiso lesicacako tukwe timbangi tabo tesicoco se-Betway Premiership.
Lo mdlali loneminyaka lengu-25 ngebudzala ugcizelela ngekutsi maBhakabhaka sekakulungele kuchubeka lapho bagcine khona ngembi kwetsi kuyiwe ekhefini le-Afcon.
IPirates ibuyela enkundleni ngeMgcibelo ngensimbi ya-3.30 ntsambama. Batawube bacudzelana nelicembu leSekhukhune United ePeter Mokaba Stadium.
Thalente Mbatha utsi angeke behlise lomfutfo lebanawo. Ngaphambi kwekhefu, i-Orlando Pirates beyisesimeni lesihle ngendlela lesimanga.
Iwine imidlalo leyimfica kuyelishumi yekugcina yeligi yadlala ngekulingana kumunye.
“Sikholwa kutsi sitawuchubeka lapho sigcine khona ngaphambi kwekhefu,” kusho Mbatha lodlala sisu sePirates.
“Sifuna kuchubeka nekuwina. Sadliwa emdlalweni wetfu wekucala sibukene neSekhukhune kantsi kuloku kumele sente kangcono. Sidzinga maphuzu laphelele.”
Kaputeni lohola lelicembu le Orlando Pirates Nkosinathi Sibisi ucinisekisile kutse letingcalamba tase Soweto tikulungele kuchubeka nemidlalo, waveta nekutsi sikwati sonke sikulungele kubuyela enkundleni.
“Wonke umuntfu wabuya atukwe simo lesihle kakhulu. Umceceshi unelicembu leligcwele lekangakhetsa kulo, lokuyintfo lenhle kitsi njengoba siya esigabeni sesibili,” kusho Sibisi lohola licembu lePirates phakatsi enkhundleni.
