UChaine ubabaza ubuhle bejezi labo elisha
Unozinti we-Orlando Pirates FC, uSipho Chaine, uthumele umyalezo okhethekile kubalandeli be-Orlando Pirates FC ngaphambi kwesizini ka-2024/25.
AmaBhakabhaka asenqobe izindebe ezine kumasizini amabili kulandelana ngaphansi komqeqeshi uJose Riveiro kusukela efike kuleli qembu ngo-2022. Ngesizini yokuqala banqobe zombili iMTN 8 Cup neNedbank Cup, baphinde baqeda endaweni yesibili kwiDStv Premiership.
Ngesizini edlule baphinde banqoba iNedbank Cup neMTN 8 Cup. Le kilabhu izophinde idlale kwiCAF Champions League okwesibili kulandelana njengoba iqede endaweni yesibili kwiDStv Premiership.
Muva nje, amaBhakabhaka abeseSpain ematasatasa nemidlalo yawo yokulungiselela isizini ka-2024/25. Badlale imidlalo yobungani emine yokulungiselela isizini bawina owodwa, badlala ngokulingana kwemibili base behlulwa kowodwa eSpain.
AmaBhakabhaka abuyele ekhaya ngeSonto ngemuva kokuphela kohambo lwawo lokulungiselela isizini eSpain. NgoMsombuluko, le kilabhu imemezele ijezi layo elisha lesizini ka-2024/25.
Umdlali wasemuva waleli qembu uSandile Mthethwa ubonakale exoxa nozakwabo mayelana nejezi labo elisha abazodlala ngalo kwisizini ka-2024/25. Uphinde waxoxa noSipho Chaine lapho uChaine ethembise abalandeli bamaBhakabhaka lukhulu.
“Ake ngikhulume ngejezi lami. Lihle impela, linemibala emihle kakhulu,” kusho uChaine.
“Kubukeka kukuhle, ukuthungwa okuhle. Ngizizwa ngikahle kulo, yiyona nto ebalulekile.
“Singabathembisa [abalandeli] ukuthi sizonikela ngakho konke enkundleni, siwine izindebe eziningi, bajabule. Siyabacela futhi ukuthi beze [enkundleni] ngobuningi njengoba behlale benza, siyababonga kakhulu,” ephetha.
Khonamanjalo, isizini ka-2024/25 kulindeleke ukuthi iqale ngo-Agasti 3 ngeMTN 8 Cup kanti amaBhakabhaka azobe ebambe iqhaza kwiMTN 8 Cup.
Iligi izoqala ngoSepthemba kanti isizokwaziwa ngeBetway Premiership ayiseyona iDStv Premiership njengoba kuqinisekiswe uDkt Irvin Khoza onguSihlalo wePremier Soccer League.
