UTim Sukazi ukuqinisekisile ukuthi sebesayinise umdlali wasemuva weChiefs
Usihlalo weTS Galaxy FC uTim Sukazi udalule ukuthi basayinise umdlali wasemuva osemncane uKhulumane Ndamane obegijima kwiKaizer Chiefs FC.
UNdamane, 20, ujoyine Amakhosi ngo-2023 esuka eqenjini elidlala ku-KZN ABC Motsepe League i-FC Drakensberg. Udlale imidlalo engu-13 wahlohla amagoli amathathu kuMakhosi ngesizini edlule kwiDStv Diski Challenge.
Khonamanjalo, lo mdlali osemncane uhehe iTS Galaxy FC. I-TS Galaxy FC isivele imsayinisile futhi uzobe edlala eqenjini lokuqala ngesizini ezayo.
“Sibe sesithola isihlabani esincane uKhulumane Ndamane ophuma kwiKaizer Chiefs. UyiCentre-Back futhi usemncane,” kusho uSukazi kuSABC Sport.
Leli qembu liphinde lasayinisa uVictor Letsoalo obekuMaZulu FC, uSiphesihle Maduna obekwiSpurs FC yaseKapa, ​​uThamsanqa Masiya obekwiSekhukhune United FC noMbombi obekwiBaroka FC.
Baphinde badayisa abadlali abathathu emaqenjini amathathu ahlukene. Badayise uMojela kwiStellenbosch FC kwathi uSanoka waya kwiSuperSport United FC. Omunye umdlali ngunozinti oneminyaka engu-24 uNtwari ojoyine Amakhosi.
I-TS Galaxy FC izobe idlala kwiMTN 8 Cup ngesizini ezayo okokuqala emlandweni wayo. Le kilabhu iqede endaweni yesithupha kanti izobe idlala neStellenbosch FC eqede endaweni yesithathu kwiDStv Premiership ngesizini edlule.
