‘Ziyamkhalela’ Saleng ku-Sundowns, Cardoso ucacisa ngesimo sakhe
Umceceshi weMamelodi Sundowns, Miguel Cardoso, sewucale kuveta kutsi kungani Monnapule Saleng angasatilolongi nelicembu lelikhulu.
Cardoso uveze kutsi lomdlali lonelikhono lelikhulu wephule imitsetfo leminyenti yekutiphatsa kulelicembu.
Likusasa laSaleng kuSundowns selisengcupheni lenkhulu, ngemuva kwekutsi lomceceshi wasePortugal acinisekise kutsi lomdlali sewususiwe ecenjini lekucala.
Uvete loku ngemuva kwekuncoba kweSundowns nge-3-2 ubukane nePolokwane City emdlalweni weMTN8 ngeMgcibelo.
Miguel Cardoso utsite Monnapule Saleng akasatilolongi nelicembu ngenca yetincumo latitsatsile letingahambisani nendlela lokufanele umdlali walelizinga atiphatse ngayo.
“Indzaba yaSaleng yehlukile. Wephule imitsetfo netimiso telicembu tikhatsi letinyenti.
“Sekunesikhatsi angatilolongi nelicembu lelikhulu,” kusho Cardoso.
Lomceceshi uphindze wembula kutsi Saleng bekafakwe eluhlwini lwebadlali lebebatawudlala emlenteni wesibili wemncitiswano we-Caf Champions League,.kodvwa wavele wanyamalala.
Uphindze wafakwa eluhlwini lwebadlali lebebatawuhamba ekhempini e-Austria,.kodvwa wala kuhamba.
“Besimnika lutsandvo nematfuba lamanyenti nanobe bekahlale enta emaphutsa.
“Kodvwa akakatimiseli kulandzela indlela lekufanele ilandzelwe ngumdlali.losezingeni leSundowns.
“Ngaleso sizatfu ikilabhu yancuma kumhlukanisa nelicembu, futsi nyalo.akasasebenti natsi,” kuphetsa Cardoso.
FUNDA NALA: Mailula ubuya ngeligoli lelikhiphe i-Downs enkingeni ku-MTN8
Njengobe sekucacile kutsi ngeke adlale ecenjini laMiguel Cardoso kule sizini, sekubukwe ngalabomvu kutsi Monnapule Saleng utawugcine aphelele kuphi.
Story by NkosinathiMasinga
