‘From zero to hero’ iPirates ibhamula i-Las Palmas
I-Orlando Pirates itfole kuncoba kwayo kwesibili eluhambeni lwekulungiselela isizini ngemuva kwekuhlula licembu laseSpain, iLas Palmas, nga-1-0 eMarbella Football Center ngaLesine.
Futsi lona kube ngumdlalo wekucala lapho Emabhakabhaka angakangenelwa khona
ligoli kuloluhambo, lokutawujabulisa umceceshi, Abdeslam Ouaddou.
Ouaddou ucale umdlalo ngekusebentisa badlali labanyenti labasebasha, lelicembu
beliholwa ngu-Cemran Dansin lobekanikwe libhande lobukaputeni.
I-Pirates ilawule umdlalo sikhatsi lesinyenti futsi yakha ematfuba lamanyenti ekushaya emagoli, akhulu kati esigabeni sekucala.
Yanela Mbuthuma ucishe wavulela i-Orlando Pirates inkundla ngeligoli emizuzwini lesihlanu yekucala, kodvwa nozinti weLas Palmas walivimba libhola lakhe.
I-Las Palmas nayo ibe nematfuba ayo, lapho Manuel Fuster ashaye khona libhola laphuma eceleni, ngaphambi kwekutsi iPirates isindze ephutseni lelikhulu ngomzuzu loyi-21.
Nozinti Siyabonga Dladla waniketa Elias Romero libhola ngeliphutsa, kodvwa lomgadli wahluleka kulisebentisa.
Emabhakabhaka acedze sigaba sekucala adlala kahle kakhulu.
UNeo Rapoo naGhampani Lungu bakhe litfuba lelihle, kodvwa ishodi ya-Lungu laphuma eceleni.
Ngemuva kwaloko Mpho Padime unikete Dansin litfuba lelihle, kodvwa nozinti we-Las Palmas wayivimba leshodi yakhe.
Ngaphambi kwekutsi kuphele sigaba sekucala, Dansin wakhele Daniel Msendami litfuba lelihle, kodvwa ibhola yakhe yashaya lipali.
Esigabeni sesibili, womabili emacembu awazange akhe ematfuba lamanyenti.
Boitumelo Radiopane naMsendami batamile kushaya ligoli, kodvwa behluleka.
I-Las Palmas nayo yashaya lipali emahlandla lambalwa emizuzwini yekugcina, kodvwa nozinti Zoey Monyepao, indvodzana yaDJ Cleo, wema wacina wavimba ishodi lebeyinemandla.
Kodvwa ekugcineni iPirates yakhona kutfola ligoli lelibalulekile lelitawukhuphula kutetsemba kwelicembu.
FUNDZA NALANA: Sekufaniswa lomdlali lomusha we-Chiefs nesihlabane sase-France
Radiopane, longene asuka ebhentjini, wabona nozinti weLas Palmas aphumile epalini wase ushaya ligoli lokube ngilo lodvwa kulomdlalo.
Ufakelwe iphasi lenhle ngu-Ghampani Lungu, lohlakate kalula umtsangala we-Las Palmas.
I-Orlando Pirates itawuphetsa luhambo lwayo lwaseYurophu ngemdlalo lapho itawubukana
ne-Neom SC yaseSaudi Arabia ngaLesihlanu.
