I-Mamelodi Sundowns icalile iyagcilata ku-Betway Premiership

I-Sundowns icalile yenta ledume ngako kumidlalo yebhola letinyawo ngaphansi kwemceceshi Miguel Cardoso waseveni lema-putukezi ngekutalwa.

I-Mmelodi Sundowns itsatse maphuzu lamatsatfu ngekuncoba ngemancagu lamabili ecadzeni kumdlalo wayo ne-AmaZulu lotsatse indzawo enkhundleni yase-Lotfus  Versfeld itolo.

Kubemdlalo lonongotelako kakhulu futsi lobowuphutfuma ngendlela lesimanga, i-Sundowns ikhombise kutikhandla kakhulu ngekutsi yakhe matfuba lamanyenti ekushaya emagoli.

Loweminyaka lengemashumi lamabilinemfica ngebudzala (29 years old) loke wadlalela licembu le-Stellenbosch Fc Iqraam Rayners uyachubeka ngekutakhela ludumo ngekutsi ashaye li-goli lakhe lekucala lelibuya ku-Tashreeq Mathews ngenhloko le-Betway Premiership kulesizini.

Kantsi ke-Tashreeq Mathews loneminyaka lengemashumi lamabilinakune ngekutalwa (24years old) lodlala lihlangotsi leliphiko naye utimisele kakhulu kulomdlalo ngekutsi ashaye ligoli lakhe lelihle lekucala kule-sizini.

Arthur Sales naye uyakhanya ngekutsatsa mklomela wekuba yindvodza yalomdlalo, Lowaseveni lase-Brazil ngekutalwa longumgadli lokhaliphile welicembu le-Mamelody Sundowns lobemuhle kakhulu emdlalweni wayitolo.

Kantsi-ke i-AmaZulu icale kahle kumdlalo wayo ne-Orbit College wangaleliviki lelengcile, ngekutsi incobe ngeli-goli linye ecandzeni.

Kumdlalo wayo ne-Sundowns itimisele kakhulu yatfola matfuba lamanyenti lafaka ekhatsi litfuba lelitfolwe ngumdlali lokewadlalela i-Kaizer Chiefs loneminyaka lengemashumi lamatsatfunakune ngebudzala (34 years old)  Hendrick Ekstein.

 Lomdlali wesisu we-AmaZulu uhluleke kufaka ibhola emuva kwenethi ngemuva kwekutfola litfuba lelihle kakhulu.

Lemiphumela yalomdlalo ibeka i-Mamelodi Sundowns kusigaba sesibili selitafula le-ligi ye-Betway Premiership, kantsi yona i-AmaZulu iyehla iyohlala kunombolo siphohlongo tukwelitafula le-ligi ye-Betway Premiership.