Lelase-Belgium selicalile ‘kuchoma’ nga-President yama-2k

Lelicembu lase-Belgium, iRoyal Union Saint-Gilloise, livete inombolo yelijezi Relebohile Mofokeng latawugcoka yona nakacala sigaba lesisha semsebenti wakhe emaveni angaphandle.

Lomdlali loneminyaka lengu-22 ngebudzala utawugcoka nombolo-38, inombolo lefana ncamashi naleyamletsela ludvumo ngesikhatsi adlalela i-Orlando Pirates.

Lenombolo seyiphendvuke yaba luphawu laMofokeng, njengobe kuleminyaka lemibili leyengcile wagcama ngayo ku-Betway Premiership.

Lelicembu lase-Belgium liphindze futsi lafaka umlayeto etinkundleni tekuchumana, lihlekisa balandzeli balo—ikakhulukati labo basekhaya—ngalomdlali.

“Ingabe benitele loku Ningizimu Afrika?” kubhale i Royal Union Saint-Gilloise, iveta lijezi  lanimbolo-38.

FUNDZA NALANA: ‘Gone kanjalo’ umgadli lomkhulu we-Sundowns Shalulile

Loku kulandzela kutsi i-Orlando Pirates icinisekise kutsi seyifinyelele esivumelwaneni nelicembu laseBelgium mayelana nekudluliselwa kwalomdlali.

I-Royal Union Saint-Gilloise kulindzeleke kutsi imemetele ngalokusemtsetfweni  Mofokeng njengemdlali wayo lomusha kulamalanga latako.

Loku kutawenteka uma sekupheleliswe yonkhe imininingwane mayelana nenkontilaki yakhe nalelicembu lelisha.

Balandzeli batawube balindze ngekulangatela kubona kutsilomdlali uyachubeka yini ngekukhombisa lithalente lelamenta waba nelidvumo njengalomunye webadlali labasha labahlonishwa kakhulu ebholeni laseNingizimu
Afrika.

Story by Nkosinathi