I-Pirates seyicolisile kubalandzeli bayo, yatsembisa nekubabhadala

“I-Orlando Pirates Football Club icela lucolo ngalokuphelele kubo bonkhe balandzeli labahlangabetane netinkinga ngesikhatsi semdlalo weBetway Premiership neMilford FC lobewudlalelwa e-Orlando Amstel Arena ngaMgcibelo.”

Lelicembu lichaze kutsi sincumo sekuvala emasango enkhundla ngesikhatsi semdlalo satsatfwa yiVenue Operations Centre (VOC) ngenhloso yekuvikela kuphepha kwabo bonkhe lebebakhona enkhundleni.

Loku kwentelwa kutsi kuvikelwe balandzeli, badlali, baphehli bemdlalo, basebenti kanye nabo bonkhe labebakhona.

I-Orlando Pirates iphindze yatsi lesimo sidalwe micimbi yemacembu etigebengu lasebenta edvute nalenkundla, lapho kutsengiswa khona emathikithi emanga futsi kungeniswa bantfu labangenawo emathikithi lasemtsetfweni.

Loku kubeke engcupheni kuphepha nekuphatsiseka kahle kwemdlalo.

FUNDZA NALANA: I-Sundowns ikhetse lowake wagajwa yi-AmaZulu esikhundleni lesikhulu

Nanoma sincumo sekuvala emasango besingakatsatfwa ngilelicembu, i-Orlando Pirates itsi iyacondza kudvumateka kwebalandzeli futsi seyimemetile kutsi labo labatsikametekile batawubuyiselwa imali yemathikithi abo.

Lelicembu liphindze lafunga kuchubeka nekusebentisana netiphatsimandla kuze kuvikelwe kuphepha kwebalandzeli kuyo yonkhe imidlalo letako.

Story by Nkosinathi Masinga