‘Madala’ Broos uchaza ngelikusasa lakhe ku-Bafana Bafana

Umceceshi we-Bafana Bafana,’Madala’ Hugo Broos, usacinisekisile kutsi utawushiya umsebenti wekucocesha licembu lesive laseNingizimu Afrika ngemuva kweminyaka lesihlanu leyigcwele imphumelelo.

Lomceceshi wase-Belgium loneminyaka lengu-74 uveze lesincumo engcogciswaneni layente neliphephandzaba laseBelgium, Voetbalnieuws, lapho atsi khona sikhatsi sakhe neBafana sesiphelile.

Broos ushiya iBafana njengemceceshi lohlale sikhatsi lesidze kakhulu emlandvweni walelicembu.

Wacashwa ngaJuni wa-2021 futsi wacala umsebenti wekwakha licembu lelagcina seliba ngulelinye lemaqembu lacine kakhulu e-Afrika.

Imphumelelo yakhe lenkhulu kube kuhola iBafana Bafana yaphumelela kuyewudlala eNdebeni yeMhlaba kwekucala emlandvweni webhola laseNingizimu Afrika.

Ngaphandle kwaloko, ‘Madala’ Broos uphindze wahola iBafana Bafana kutsi ifinyelele kabili kulandzelana ku-Africa Cup of Nations, yaphindze yawina indondo yelitfusi emncintiswaneni wa-2023 lowawubanjelwe e-Ivory Coast.

FUNDZA NALANA: Sicakacaka ku-Chiefs bashiya Lilepo balibangise e-Spain

Kuhamba kwaBroos kusho kutsi iSafa kutawudzingeka isheshe icedze luhlelo lwekucasha umceceshi lomusha ngaphambi kwekutsi kucale imidlalo yekuhlungela i-Afcon ya-2027 ngaMandvulo.

Ungcotjiswa Wetemidlalo, Gayton McKenzie, sewake waveza kutsi ufuna Pitso Mosimane kube nguye lotawutsatsa tintsambo kuHugo Broos kuBafana Bafana.

Story by Nkosinathi